السلام عليكم هي أولاً
انا قصتي قصة ، رح أحكيلك اياها إذا عندك وقت...
المهم هلأ بدي أدخل بالموضوع.... استعنا ع الشقى بالله:
اولا لماذا اخترت هذا التخصص؟
انا تخصصي هو بيولوجيا جزيئية/ كيمياء حيوية (كلية العلوم).... احنا بجامعتنا بنتخرج بتخصصين واحد رئيسي والتاني مساند.... والطالب بيقدر يشتغل بالتخصصين لما يتخرج.... عدد سنوات الدراسة 4 سنوات... بس بعد ما تطلع عنيكي طبعاً.... انا اخترت هدا التخصص بناءً على رغبتي لأنه مطلوب كتيير وهو تخصص جديد وبالإضافة إلى انه الظروف ساعدتني كمان.... الحمد لله.
أنا بالأول درست كورس بالجامعة الاسلامية بغزة على اساس ادرس هندسة اتصالات.... بس بعد الانتفاضة أهلي قدمولي ع الجامعة في البلد العربي اللي احنا فيها.... ومع انه من الصعب قبول الفلسطينيين فيها... بس سبحان الله الله يسر وانقبلت.... ودرست التخصص اللي نفسي فيه وهو باختصار هندسة جينات (molecular biology/ biochemistry)
ثانيا هل هذا هو التخصص الذي كنت تحلم به؟
من أول ما سمعت عن الجينات والأبحاث اللي بتصير عليها بالوقت الراهن كان نفسي أكون على معرفة باللي بصير في هذا المجال.... والحمد لله الله حقق لي امنيتي.
ثالثا هل انت مرتاح في تخصصك الان؟
انا هلأ اتخرجت والحمد لله
.... بعد جهد جهيد طبعاً.
... التخصص نادر وصعب ولأنه جديد الدكاترة بييجوا بتفلسفوا فوق راسنا
وكانوا يطلبوا منا واجبات وتقارير كتيير علشان نقدر نتوسع بهدا المجال.... يعني انا ما كنت ادرس قد ما كنت اكتب ع الكمبيوتر وادور بالنت ع المعلومات... ومرات كتييير بيكون الدكتور ما بيفهم الخمسة من الطمسة بالمادة وبصير كل الجهد عليكي علشان تفهمي المادة وشو هو بدو بالضبط .....بس كنت مستمتعة بدراستي الحمد لله
رابعا هل انت مرتاح في الجامعة التي تدرس فيها؟
صراحة ما كنت مرتاحة بالأول... لأني كنت أحس حالي غريبة... بس بعدين صرت ادس انفي بكل كبيرة وصغيرة وما كنت اخلي حد من شري... بس الشي اللي بكره بهي الجامعة انه الادارة ما منيحة... يعني بدك تجري ورا المواد لحتى تنزل بالكورس وتتخرجي .... وتترجي فلان وعلنتان
.... بس يلا الحمد لله عدت... نشكر الله
بس المأساه التانية اني هلأ مقدمة ما جستير بنفس الجامعة على تخصصي المساند biochemistry بكلية الطب مو العلوم .... وهدا شي بمصلحتي (على ما أظن إنه راح يكون بمصلحتي) .... لأني بصراحة قرفت من العلوم واللي فيها... حسبي الله وهو نعم الوكيل
خامسا حدثنا عن تخصصك.
تخصصي هو هندسة جينات ... درست فيه الوراثة وكيف يتم نقل الأمراض الوراثية وشو هي أحدث الوسائل المستخدمة للتنبؤ بها او علاجها ( التنبؤ مو يعني أنه احنا سحرة ودجالين .... لأ احنا بندرس شجرة العائلة وبنشوف إذا الجنين ممكن يكون مصاب بمرض وراثي معين ولا لأ)
هدا تخصصي الرئيسي molecular biology أما تخصصي المساند اللي هو الكيمياء الحيوية biochemistry فهدا أكيد الكل بيعرفه علم بيهتم بالتفاعلات الكيميائية اللي بالجسم وعلمية الهدم والبناء للمواد اللي بيحتاجها الجسم.... درست فيه عن الهرمونات والخلايا وكيف ممكن تتأقلم مع الضغوطات اللي عليها.... وأحلى مادة درستها كانت مادة التغذية وهي اكتر شي استمتعت فيه
وبالتخصص الرئيسي بقدر أشتغل بمجال الأبحاث العلمية أما بالتخصص المساند فبقدر أدخل مجال الأبحاث ومجال التحاليل الطبية (فنية مختبر يعني... انا هلأ بدرب في هدا المجال)
وهلأ انا مقدمة ماجستير وإن شاء الله ناوية أعمل الرسالة تبعتي عن الهورمونات او في التغذية
بس انت ادعيلي :wink:
آسفة ع الاسهاب والاطالة بالرد.... بس شو أعمل انا بحب تخصصي كتييير وبتمنى أنه ناس كتييير تفوته لأنه بجد حلو كتييير.... بس المشكلة أنه ما إله مستقبل بالدول العربية… بس الدول الأجنبية هي اللي بتعمل أبحاث عليه وبتهتم فيه